МАЛИ И ГОЛЕМИ ЛИКОВНИ УМЕТНИЦИ

Во рамки на долгогодишната соработка помеѓу детската градинка „Орце Николов“ – општина Карпош и Педагошкиот факултет и факултетот за Ликовни уметности во Скопје, денеска, дечињата беа домаќини на студентите кои заедно организираа ликовен хепенинг. Малите и големи уметници се дружеа и сликаа во дворот на градинката, меѓусебно учејќи едни од други. Идните ликовни педагози учеа практично за методологијата и пристапот кон интелектуалното анимирање на помладите, а дечињата му дадоа колоритна разиграност на големиот бел хамер, изразувајќи ги своите уметнички експресии, со специјалните еколошки, акрилни бои.

28.04.2016 12:29:44

МЕЃУНАРОДНО ЗЛАТО ЗА КАРПОШОВИОТ ПИЈАНИСТ

Младиот пијано виртуоз Михаил Димовски, го освои првото место и златниот медал на XI Меѓународен натпревар за млади изведувачи на класична музика, кој се одржа минатиот викенд, во дворецот на културата во Перник – Р. Бугарија. Во рамки на оваа културна манифестација, покрај првото место, Димовски ја освои и специјалната награда за солист на камерниот оркестар „Орфеј“.

28.04.2016 12:27:48

ХУМАН ГЕСТ „ОД ДЕЦА ЗА ДЕЦА“

Во ООУ ,,Јан Амос Коменски‘‘, вчера, се одржа традиционалниот Велигденски хепенинг, на кој беа изложени прекрасни украси и подароци изработени од вредните раце на учениците, наставниците и родителите. Во соработка со одделението за детска, социјална и здравствена заштита при општина Карпош, подмладокот на училишниот Црвен Крст и советот на родители, собраа средства кои ќе бидат наменети за малиот карпошанец, девет годишниот Ѓорѓи кој боледува од церебрална парализа и аутизам.

28.04.2016 12:25:57

БРОНЗА ЗА ПИНПОНГАРСКИОТ АС БУЖАРОВСКИ

Актуелниот кадетски државен првак во пинг-понг, Методиј Бужаровски, го освои третото место (парови), на 24-то Државното првенство кое се одржа минатиот викенд во Штип.

28.04.2016 12:20:20

110 ХУМАНИТАРНИ ПАКЕТИ ЗА СОЦИЈАЛНИТЕ СЕМЕЈСТВА ОД КАРПОШ

По повод претстојните Велигденски празници, денеска, претседателот на Советот на општина Карпош, Сашо Лазаровски и Секретарот на Општината, Бојан Милошевски, во неколку урбани заедници им поделија хуманитарни пакети на социјално загрозените лица, кои живеат на територијата на локалната самоуправа. Благодарение на донациите од карпошани, од насобраните прехранбени продукти ќе се обезбедат 110 хуманитарни пакети, кои ќе ги збогатат семејните трпези на граѓаните со социјален ризик. Во досега најмасовната хуманитарна акција „Да бидеме хумани за нашите соседи“ која по 18-ти пат ја спроведе одделението за детска, социјална и здравствена заштита при општина Карпош, минатиот викенд, учествуваа и младите карпошани од неколку основни училишта ширум општината, како и општинската администрација.

27.04.2016 14:00:53